Lubi něhdyši a nětčiši čłonojo a přećeljo Sorabije,
Centrifuga wita Was dźensa, jutře, přeco zas! Tute hesło je tak stare kaž internatna bara
sama. Koło časow pak so njepřestajnje wjerći – tež w našim lubym internaće kóžda
tapeta wjace njedźerži, tu a tam so fasada drjebi a postawa našeho Handrija so hižo na
nowy domicil wjeseli. Přećehnjemy, ale prjedy hač tak daloko je, chcemy so wšitcy z
Centrifugu rozžohnować.
Dnja 24.7. wječor wot wosmich (sedmich) do 25.7. popołdnju
maće hišće raz móžnosć, serbsku bjesadu dožiwić, k słowjanskim zynkam rejować a sej
maćernorěčnu wutrobitosć lubić dać. Smy hižo wćipni na Waše dožiwjenja, kiž z
Centrifugu zwjazaće. Budźe to najdlěša party, kotruž sće w Lipsku dožiwili. Chcemy z
Wami po Lipsku pućować, so swjatočnje z internatom rozžohnować a wězo tež porjadnje
hejsować.
Krótki programowy přehlad:
sobotu, dnja 24.7., wot 20 hodź.: serbska bjesada, kulturny program z překwapjenku,
přinoški k stawiznam serbskeho internata, hudźbne wobrubjenje
njedźelu, dnja 25.7., wot 9 hodź.: zhromadna snědań
wot 11 hodź.: special z Lipšćanskimi studentami, po tym wobjed
14.30 hodź.: dźakny nyšpor
wot 15 hodź.: čołmikowanje po Lipšćanskich kanalach
Sorabičenjo wjesela so hižo na Was wšěch
, přińdźće z dobrej naladu a přinjesće swojichpřećelow, přećelki a znatych sobu. Piwa a winka mamy dosć. K jědźi njezmějemy drje
serbsku kwasnu jědź, za to pak druhe dobre chłóšćenki. Tež za dźěći mamy pisany
program předwidźany, samo plackoweho muža smy organizowali.
Centrifuga wita Was, dźensa, jutře, přeco zas!
Z lubym postrowom Waša Lipšćanska Sorabija
PS.: Bychmy so wjeselili, jeli byšće nam krótku wotmowłu napisali, hač přińdźeće abo
nic, zo bychmy móhli lěpje kalkulować. Wutrobny dźak!
